Kryeministri i Shqipërisë, Edi Rama, ka folur për protestat kundër projektit të zhvillimit dhe ruajtjes së mjedisit, duke iu referuar edhe qëndrimit të këngëtares shqiptare Dua Lipa.
I pyetur nëse përmendja e Dua Lipës mund të konsiderohet si element propagandistik, Rama tha se këngëtarja është krenare për protestën, ndërsa ai u shpreh se është krenar për të.
“Ajo është krenare për protestën, unë jam krenar për të. Është ideologji kur thua ose zhvillimi ose konservimi. Duas i pëlqen protesta, unë e dua shumë Duan”, tha Rama.
Në vijim, kryeministri bëri një krahasim me figurën e Papës, duke theksuar se fakti që e pëlqen ose respekton dikë nuk do të thotë se është dakord me çdo qëndrim të tij.
“Ajo është këngëtare, nuk është Papa. Më pëlqen Papa, por s’jam dakord me çdo gjë që thotë Papa”, u shpreh Rama.
Rama tha se nuk e sheh çështjen si një zgjedhje mes zhvillimit dhe konservimit, duke argumentuar se të dyja mund të bashkëjetojnë. Ai foli gjithashtu për reagimet ndaj protestave dhe për përvojën e tij të mëparshme si protestues.
“Unë vij vetë nga pala e protestuesve, kam rrezikuar jetën realisht për fjalën e lirë”, deklaroi ai, duke shtuar se është tërheqëse të mendosh se protestuesit kanë gjithmonë të drejtë dhe se qeveria, kur sulmohet, është në gabim.
Në fund, Rama tha se situata do të përfundojë, sipas tij, në mënyrë të mirë për të dyja palët, ndërsa premtoi publikimin e dokumenteve dhe të dhënave që lidhen me projektin.
“Nëse shkenca thotë që nuk duhet prekur… nuk është betejë personale. Do të publikojmë çdo gjë që kemi dhe pasqyra do të përfshijë çdo gjë të re”, përfundoi Rama.
