BFA 2021 – Bukuria, Edukimi dhe Fuqizimi i Gruas në Zemër të Tiranës

Më 17, 18 dhe 19 Shtator 2021, duke zbatuar të gjitha rregullat e lidhura me situatën e pandemisë Covid-19, Beauty Fair Albania u zhvillua në ambient të hapur në një nga sheshet më të bukura dhe më të preferuara për aktivitete në Tiranë, “Sheshi Italia”. Kjo hapësirë ndodhet në një zonë mjaft të populluar në Tiranë dhe njihet ndryshe nga të gjithë me emërtimin jozyrtar si sheshi i rinisë, duke qenë se është shumë i frekuentuar nga të rinjtë në çdo moment të ditës me biçikleta, monopatina, skateboard, iPad apo lojëra digjitale që janë më “In” sot.

Në ambientet e panairit u zhvilluan aktivitete dhe shfaqje të ndryshme që synonin jo vetëm informimin, por edhe edukimin, argëtimin dhe përfshirjen e të gjithë pjesëmarrësve, si ekspozuesve ashtu dhe vizitorëve të panairit. Këto aktivitete—që përfshinë seminare, praktika për të njohur makineritë më inovative për estetikën, sfilata mode me stilistë të rinj, show për djemtë për stilime të flokëve dhe mjekrës, si dhe praktika për të rinjtë që synonin të fitonin bursat e plota të ofruara nga Beauty Fair Albania—u kulmuan nga një event mjaft i rëndësishëm social i titulluar “E bukura je ti… E bukura është grua…” me pjesëmarrjen e grave përfaqësuese të fushave të ndryshme, kushtuar vajzave dhe grave afgane dhe mbështetjes që dha vendi ynë për to, kombinuar me rëndësinë dhe fuqizimin e gruas dhe femrës shqiptare në aspekte të ndryshme të jetës. Fuqia e kontributit të femrës në Shqipëri është shumë e rëndësishme për Beauty Fair Albania.