Elijona Binakaj ka reaguar përmes një postimi në rrjetet sociale lidhur me protestën e studentëve në Shqipëri, duke shprehur shqetësimin për pamjet e dhunës dhe përplasjet me policinë.
Ajo e ka cilësuar situatën si të frikshme dhe tronditëse, duke theksuar se humbja e shpresës nga të rinjtë në vendin e tyre është një shenjë se diçka nuk po shkon siç duhet.
“Kur rinia e humb shpresën në vendin e vet, diçka nuk është në rregull”, shkruan Binakaj, duke vënë në dukje se të rinjtë duhet të kenë mundësi të ëndërrojnë dhe të ndërtojnë të ardhmen e tyre, në vend që të detyrohen të dalin në rrugë për të luftuar për të drejtat e tyre.
Në reagimin e saj, ajo ka përcjellë një mesazh të qartë në mbështetje të studentëve, duke theksuar se Shqipëria dhe të rinjtë e saj meritojnë më shumë.
“Shqipëria meriton ma shumë. Rinia meriton ma shumë. Asnjë i ri nuk duhet me e humb shpresën në vendin ku është rritë”, përfundon ajo, duke e shoqëruar postimin me hashtagun #MeStudentatPërStudentat.
