Propofoli, një anestezik intravenoz me veprim të shpejtë, dyshohet se ishte shkaku kryesor i vdekjes së këngëtarit të njohur grek Giorgos Mazonakis, sipas rezultateve të një raporti toksikologjik të përgatitur nga Laboratori i Mjekësisë Ligjore dhe Toksikologjisë në Universitetin Aristoteli të Selanikut.
Sipas burimeve të cituara nga media greke Protothema, në raportin prej 30 faqesh thuhet se në trupin e artistit janë zbuluar edhe tetë substanca të tjera, të cilat, në kombinim me propofolin, mund të kenë kontribuar në përkeqësimin e gjendjes së tij dhe në vdekjen e parakohshme.
Ekspertët kanë analizuar disa herë mostrat e marra nga trupi i këngëtarit, ndërsa raporti pritet t’u përcillet autoriteteve të drejtësisë për t’u administruar në hetimin që po zhvillohet.
Një nga elementet më shqetësuese të raportit lidhet me një episod apneje, pra ndalimin e frymëmarrjes, që dyshohet se ka ndodhur gjatë procedurës së plazmaferezës, pasi Mazonakis kishte marrë propofol. Sipas burimeve, nëse do të ishte siguruar në kohë oksigjenimi i pacientit, jeta e tij mund të ishte shpëtuar.
Këngëtari 54-vjeçar ndërroi jetë më 9 shtator, pasi pësoi arrest kardiak gjatë një procedure plazmafereze në një klinikë private në zonën e Kolonakit, në Athinë. Ai u transportua më pas në spitalin Elpis, ku u konfirmua vdekja.
Rasti ka shkaktuar reagime të shumta në Greqi, ndërsa hetimet po përqendrohen te rrethanat e procedurës mjekësore, administrimi i anestezikut dhe koha e reagimit të personelit shëndetësor. Raporti toksikologjik, së bashku me rezultatet e ekspertizave të tjera, do t’i dorëzohet hetuesit që po merret me çështjen.

