Këtë vit, Festivali i Këngës në Eurovision e dëshmoi se është një nga spektaklet më të ndjekura kulturore në mbarë botën.
Edicioni i këtij viti, i zhvilluar në Bazel të Zvicrës, u pa nga 166 milionë shikues në 37 vende që bëjnë pjesë në rrjetin e transmetuesve publikë një rritje prej tre milionë krahasuar me vitin 2024.
Miliona të tjerë nëpër botë u përfshinë në përmbajtjen e lidhur me festivalin, nga performancat deri te momentet prapa skenës. Kanalet zyrtare dixhitale të Eurovision-it arritën një shifër mbresëlënëse prej gati dy miliardë shikimesh për videot, historitë dhe përmbajtjet e shpërndara.
Organizuar nga transmetuesi publik zviceran SRG SSR, ngjarja përfshiu tre netë transmetimi – më 13, 15 dhe 17 maj – duke ofruar më shumë se nëntë orë prodhim televiziv me cilësi të lartë, i cili u shpërnda në shumë vende përmes transmetimeve ndërkombëtare.
Shikim rekord
Finalja e Madhe arriti një përqindje shikueshmërie prej 47.7%, që është rezultati më i mirë që nga viti 2004 dhe më shumë se dyfishi i mesatares së të gjitha kanaleve që transmetuan konkursin.
Midis të rinjve (15-24 vjeç), pjesa e shikueshmërisë ishte një shifër mbresëlënëse prej 60.4 për qind, rezultati më i lartë i regjistruar.
Finalet në 19 nga 37 vende patën shikueshmëri më të lartë se 50 %, të kryesuara nga Islanda (97.8 %), Finlanda (90.5 %), Suedia (89.6 %), Norvegjia (85.4 %) dhe Danimarka (75.1 %).
Vendet me shikueshmërinë më të lartë
Gjermania: 9.1 milionë shikues – rezultati më i mirë që nga viti 2016.
Polonia: katër milionë – tre herë më shumë se në vitin 2024.
Franca : 40 për qind e audiencës – një nivel historik i lartë
Greqia : 2.8 milionë shikues dhe 70.8 për qind e shikueshmërisë – shifra më e mirë që nga viti 2010.
Në kanalin e Eurovision në YouTube, finalja e madhe regjistroi 12.1 milionë shikime në shtatë ditët pas transmetimit, një rritje prej tetë për qind krahasuar me vitin 2024. Gjysmëfinalet tërhoqën 4.4 dhe 3.4 milionë shikime.
