BFA 2019 – Edicioni i parë i panairit më profesional të bukurisë në Shqipëri

Edicioni i parë i Panairit më profesional të bukurisë, i sjellë për herë të parë në Shqipëri më 18 dhe 19 Maj 2019 në Pallatin e Kongreseve në Tiranë, tregoi se tregut shqiptar i kishte munguar një panair i këtij niveli, duke identifikuar në mënyrë të konsiderueshme se sa i rëndësishëm ishte një panair profesional ku shumë distributorë të mund të kishin mundësinë për të ekspozuar produktet e tyre dhe të gjitha markat që ata trajtonin, duke qenë se në shumë raste konsumatori nuk ishte i informuar që këto marka të njohura ndodheshin edhe në Shqipëri. Filluam me një ekip minimal prej dy vetash dhe shumë pasion. Përkundër përpjekjeve për të sjellë një nga markat e njohura ndërkombëtare si Cosmoprof apo Sephora, vendosëm të ndërtonim diçka unike dhe autentike.

Panairi u realizua për herë të parë në Pallatin e Kongreseve, duke bashkuar marka vendase dhe ndërkombëtare, me një përkushtim maksimal për detajet dhe estetikën. Stafi ynë u zgjerua në tre vetë me bashkimin e Sara Fani, duke e kthyer projektin në një sukses të madh që i dha Shqipërisë një event të denjë për industrinë e bukurisë. Kjo përvojë ishte jo vetëm një sfidë, por edhe realizimi i një ëndrre.